Şərq müdrikləri inanırdılar ki, hər bir insan, heç olmasa, öz ətrafında səliqə-səhman yaratmağı bacararsa, dünya gözəlləşər.

Azərbaycanda təkcə ötən il öz vəzifə borcunu yerinə yetirən dörd süpürgəçi avtomobil vurması nəticəsində həlak olub. Bu il isə indiyədək iki belə hadisə qeydə alınıb və ümid edək ki, bununla da bu kədərli statistika sona çatacaq.

Süpürgəçinin böyük hay-küyə səbəb olan vurulması hadisəsi 2013-cü ildə Novruz bayramından sonra Bakıda baş vermişdi. Hadisə ölkə ictimaiyyətinə yaxşı tanış olan idmançı tərəfindən törədilmişdi.
Martın 28-də, o zaman Kiprin "Anortosis", indi isə Ağdamın "Qarabağ" futbol klubunun şərəfini qoruyan, Azərbaycan milli yığmasının üzvü Araz Abdullayev Bakının Xətai rayonu ərazisində yol süpürən iki qadını vurmuşdu.
Hadisə sosial şəbəkələrdə gərgin müzakirələrə və qınağa səbəb olmuşdu.

Zərərçəkmişlərdən biri olan Zəminə Hüseynova hadisə yerindəcə keçinmişdi. Digəri, 1968-ci il təvəllüdlü Gülsabah Nuriyevanı isə Abdullayev hadisə yerinə gəlmiş təcili tibbi yardım maşını ilə birlikdə Kliniki Tibbi Mərkəzə aparmışdı.

Cüzi də olsa, gəlir gətirən məşğulluqla pərdələnən tənhalıq. Ahıl yaşında, Bakının Badamdar qəsəbəsində küçələri süpürən xadimələrdən biri olan Zəhra nənənin həyatını və dolanışığını belə xarakterizə etmək olar.

Köhnəlmiş, tozlu donlu, göy jiletli insan fiquru asta-asta ləngər vuraraq, kiçik parkın və ona bitişik prospektin ərazisini süpürür. Tər damcıları qırışlı alnına yayılır, dodağında isə kədərli təbəssüm donur...

Onlar — gözəgörünməz cəbhənin döyüşçüləri şəhər yenicə oyanmağa başlayanda işə çıxırlar. Sputnik Azərbaycan-ın əməkdaşı onlarla görüşərək, ayırd etməyə çalışıb ki, gecə-gündüz bizim geridə buraxdığımız tonlarla zibili yığışdıran, küçələri təmizləyən bu xüsusi geyimli "gözəgörünməz qəhrəmanlar" kimlərdir və biz onların əməyinə nə qədər qiymət veririk. Bu qadınların hər birinin öz həyat tarixçəsi var.

Və şəhərimizin gözəlliyinə xidmət edən bu insanları bəziləri, hətta "nindza" adlandırırlar. Məhz bu yanaşma ondan dolayı meydana çıxıb ki, onlar daim üzü bağlı çalışırlar və peşələri onları həyatla ölüm arasında saxlayır.
Əslində isə, onların üzlərini gizləməsinin iki səbəbi ola bilər: ya onlar süpürgəçi işlədiklərindən utanır, kiminsə onları tanımaması üçün belə edirlər, ya da bu yolla özlərini toz-torpaqdan qoruyurlar.
Əslində, onlar çox vacib işlə məşğuldurlar və burada utanmalı heç nə yoxdur.

Bakı şəhəri Yasamal rayonu Mətbuat prospekti və Şərifzadə küçəsində səhər saatlarında təmizlik işləri.

Süpürgəçi qadınların avtomobillə vurularaq öldürülməsi ilə nəticələnən bədbəxt hadisələrdən sonra bu il aprelin 5-də Daxili İşlər Nazirliyi rəhbərliyinin sifarişi ilə təmizlik işləri aparan şəxslərə xüsusi jiletlər paylanılıb. Bu jiletlər magistral yollarda, küçə və prospektlərdə təmizlik işləri aparan şəxsləri avtomobil qəzalarından qorumaq məqsədilə hazırlanıb.

Bakı həmişə öz təmizliyi, çoxsaylı parkları və yaşıllığı ilə seçilib. Bu ənənə hələ sovet vaxtından formalaşıb. Küçələrin xüsusi maşınlarla yuyulması indi orta və yaşlı nəslə nostalji kimi görünür. Məşhur "Gün keçdi" bədii filminə tamaşa edənlər isə bu nostalji hissini yaşaya bilərlər.

Bakı şəhər rəhbərliyi paytaxt küçələrini təmizləmək üçün yeni texnikanın alındığı barədə məlumat yayıb. Ümid edək ki, bundan sonra gözəllik "mələkləri" "nindza" olmaqdan qurtulacaqlar və şəhərimizin küçə və prospektlərinin təmizliyi uğrunda öz həyatlarını riskə atmalı olmayacaqlar.