Müsəlmanların müqəddəs kitabı "Quran"da nar ağaclarının cənnət bağlarında bitdiyindən bəhs edilir. Edem haqqında İncil əfsanəsinə görə, ilan ilk qadın Həvvanı cənnətin nar bağında yoldan çıxarıb, alma bağında deyil. Ona görə də, əsl "cənnət alması" məhz nardır.

Fen-şuy fəlsəfəsinə görə, nar möhkəm ailənin simvoludur. Əgər siz ailə üzvlərinin tamamlanmasını və doğuşun problemsiz baş tutmasını istəyirsizsə, şirəli meyvəni iki hissəyə bölün və bir hissəsini evin şimal hissəsinə qoyun.

Qədim yunan miflərinə görə, bu meyvə insana ölümsüzlük bəxş edir. Bu səbəbdən də nar Olimp allahlarının sevimli qidası olub. Əfsanələrdən birində ilk nar ağacının Kiprdə məhəbbət ilahəsi Afrodita tərəfindən əkildiyindən bəhs edilir. Yunan toylarında nikah zamanı narın bölünməsi adəti də buradan qaynaqlanır. Cütlüklərin nar dənələri kimi artıb-törəməsini, oğul-uşaq sahibi olmasını simvolizə edir. Nar şirəsi isə məhəbbət iksiri kimi tanınır. Çində də toyda gənc cütlüyə xeyir-dua verərkən şirin nar yedizdirmək adəti var. Dənələri görünən narın rəsmi isə sevimli toy hədiyyəsidir.

Azərbaycanda da narla bağlı bir ənənə var: toy mərasimi zamanı gəlin öz yarı ilə görüşərkən ona tərəf nar və ya alma atmalıdır. Azərbaycan əfsanələrində deyilir ki, nar sevgi və ehtiras simvoludur. Sevgini sözlərlə ifadə etmək nəzakətli hesab olunmurdu. Gənc oğlanlar qızlara nar meyvələrini gətirməklə öz hisslərini bildirir və sevgilərini təklif edirdilər.

Nar İsraildə nəsil artımı simvolu olan yeddi bitkidən biridir. Yeri gəlmişkən, burada ancaq boyu 6 metr olan ağacdan 60 kq-a qədər məhsul yığmaq olar. Meyvələrin özləri isə kifayət qədər iri həcmlidir.

Qədim zamanlardan Şərqdə yuxarı hissəsində olan "tac"a və unikal xüsusiyyətlərinə görə narı "kral meyvəsi" adlandırıblar. Belə bir fikir var ki, məhz nar insanlarda kralın başına qoyulan tacı bu formada düzəltmək ideyasını yaradıb.