«Վերնիսաժում» երբեք զբոսաշրջիկների պակաս չի լինում: Քաղաքի կենտրոնում տեղակայված, վերանորոգված և վերակառուցված շուկան հաճախորդներին առաջարկում է տարբեր տեսակի ու ճաշակի ամանեղեն և զարդեր: Մեծ է նաև հուշանվերների, դուդուկների ու նարդիների տեսականին:

Երևանի գլխավոր խորհրդանիշներից մեկը Հանրապետության հրապարակն է, որը 1924 թվականին կառուցվել է Ալեքսանդր Թամանյանի նախագծով: Բոլոր հաջորդ տարիների ընթացքում հրապարակի տարածքը բարելավվել է: Այստեղ են գտնվում պատկերասրահի, կառավարության, փոստային բաժանմունքի շենքերը, հյուրանոցներ և ՀՀ ԱԳՆ նախկին շենքը:
Հատկանշական առանձնահատկությունն այն է, որ շենքերը
կառուցված են տուֆից և բազալտից:

Մատենադարանը գիտահետազոտական ինստիտուտ է և հին ձեռագրերի բացառիկ պահոց:

Այստեղ հավաքված շուրջ 17.000 ձեռագիր մատյաններն ընդգրկում են հայ հին և միջնադարյան գիտության ու մշակույթի գրեթե բոլոր բնագավառները` պատմություն, աշխարհագրություն, քերականություն, փիլիսոփայություն, իրավունք, բժշկություն, մաթեմատիկա, տիեզերագիտություն, գրականություն, վավերագիտություն, արվեստի պատմություն, մանրանկարչություն, երաժշտություն և այլն:

Հայերեն մատյաններից բացի այստեղ պահվում են արաբերեն, պարսկերեն, հունարեն, ասորերեն, լատիներեն, եթովպերեն, հնդկերեն, ճապոներեն և այլ լեզուներով ձեռագրեր:

Մշակութային ժառանգության պահպանության այս հաստատությունում կորստից փրկվել են բազմաթիվ բնագրեր, որոնք իրենց մայր լեզվով չեն պահպանվել և հայտնի են միայն հայերեն թարգմանությունները:

«Կասկադ» եզակի ճարտարապետական համալիրը սիրված վայր է երևանցիների և հյուրերի համար:

Օպերայի և բալետի թատրոնի, Մեսրոպ Մաշտոցի պողոտայի և Բաղրամյան ու Մոսկովյան փողոցների միջև գտնվող «Կասկադը» սկիզբ է առնում մի փոքրիկ պուրակից, որտեղ տեղադրված է ճարտարապետ Թամանյանի հուշարձանը:

«Կասկադի» բարձունքից երևում է քաղաքի շքեղ տեսարանը, բայց այդ բարձունքին հասնելու համար նախ պետք է հաղթահարել 740 աստիճանը, որոնք տանում են դեպի Հաղթանակի զբոսայգի:

Ցերեկային ժամերին, երբ երկինքն ամպամած չէ, կարելի է զմայլվել նաև Արարատ լեռով, որը հայրենիքի խորհրդանիշն է աշխարհի տարբեր անկյուններում ապրող ամեն հայի համար: Կասկադ համալիրում է գտնվում նաև Գաֆեսճյան արվեստի կենտրոնը: