Դիտորդների, ԶԼՄ-ների
Եվ Վստահված անձանց
մասնակցությունը
ԱԺ ընտրությանը

Ինչո՞ւ են անհրաժեշտ դիտորդների և ԶԼՄ-ների մասնակցությունը ընտրությունների ժամանակ։
Դիտորդները իրենց ներկայությամբ մասնակցում են ընտրության գործընթացին և ձայների հաշվարկին։ Նրանց ներկայության գլխավոր նպատակը ընտրությունների օրինականության ապահովումն է և ընտրությունների վերաբերյալ անկախ եզրակացության ձևավորումը։ ԶԼՄ-ները իրենց հերթին լուսաբանում են ընտրությունները` քվեարկության ընթացքի վերաբերյալ տեղեկություն ներկայացնելով հանրությանը։
Ո՞վ կարող է դիտորդ լինել։
Ընտրությունների ընթացքում դիտորդ կարող են լինել Հայաստանի և միջազգային այն հասարակական կազմակերպությունները, որոնք նպաստում են ժողովրդավարությանը և մարդու իրավունքների պաշտպանությանը։ Այդ կազմակերպությունները ընտրություններին մասնակցելու համար պետք է հավատարմագրվեն Կենտրոնական ընտրական հանձնաժողովի կողմից։ Դիտորդը պարտավոր է լինել անկողմնակալ, օբյեկտիվ և չեզոք, զերծ մնալով թեկնածուներին սատարելուց։
Ի՞նչ իրավունքներ ունեն դիտորդները և ԶԼՄ-ների ներկայացուցիչները։
Դիտորդները և ԶԼՄ-ների ներկայացուցիչները քվեարկության օրն իրավունք ունեն անմիջապես ներկա գտնվելու ընտրատարածքներում, որպեսզի դիտարկեն քվեարկության ընթացքը։ Բացի դրանից, նրանք իրավունք ունեն ծանոթանալու ընտրական հանձնաժողովի տրամադրության տակ գտնվող փաստաթղթերին։ Քվեարկության սենյակում նրանց ազատ տեղաշարժը խոչընդոտելն արգելվում է։ Միևնույն ժամանակ դիտորդները և ԶԼՄ-ների ներկայացուցիչները տեսանելի ձևով պարտավոր են կրել Կենտրոնական ընտրական հանձնաժողովի տված վկայականը։
Ի՞նչ կարող է անել դիտորդը, երբ խախտում է տեսնում։
Խախտում նկատելու դեպքում դիտորդը ԶԼՄ-ների միջոցով հայտարարությամբ հանդես գալու իրավունք ունի։
Ո՞վ է վստահված անձը։
Ընտրություններին մասնակցող կուսակցությունները պետական մարմինների, կազմակերպությունների և ԶԼՄ-ների հետ փոխհարաբերություններում իրենց շահերը ներկայացնելու նպատակով կարող են ունենալ վստահված անձինք:
Ո՞վ կարող է լինել վստահված անձ։
Վստահված անձ կարող են լինել միայն ընտրական իրավունք ունեցող անձինք: Վստահված անձ չեն կարող լինել պետական այն աշխատողները, որոնց օրենքով արգելված է որևէ կերպ դրսևորել իրենց քաղաքական նախապատվությունները (դատավորներ, դատախազներ, քննիչներ և այլն):
Ի՞նչ իրավունքներ ունեն վստահված անձինք։
Ինչպես դիտորդները և ԶԼՄ-ները, վստահված անձինք ևս քվեարկության ընթացքում քվեարկության սենյակում ներկա գտնվելու և ընտրական հանձնաժողովի տրամադրության տակ գտնվող փաստաթղթերին ծանոթանալու իրավունք ունեն։ Բացի դրանից, վստահված անձինք կարող են մասնակցել ընտրական հանձնաժողովի նիստերին, տեսանկարահանել այդ նիստերը և անհրաժեշտության դեպքում բողոքարկել ընտրական հանձնաժողովի որոշումները։
Դիզայներ՝ Շուշանիկ Սարգսյան Աղբյուր՝ iravaban24.am